Protesta kundër projektit në Zvërnec në ditën e 5 në Tiranë nisi me porosinë për të prirë marshimin fëmijët dhe gratë. Mijëra qytetarë ecën drejt bulevardit Dëshmorët e Kombit, për të qëndruar në pikën kyçe para kryeministrisë. Protesta nuk pranon të ketë kokë drejtimi, por fjalimet u hapën me një deklaratë nga Klajdi Bello, i njohur nga protesta e studentëve të 2018, i rikthyer në emër të grupit nismëtar lëvizjes me baza patriotike që theksohet se udhëhiqet nga qytetarë të lirë. Kjo lëvizje mbarëkombëtare përfaqësohet nga një grup nismëtar dhe një grup koordinues patriotësh me integritet dhe vlera të larta intelektuale e shoqërore, gra dhe burra dinjitozë, të rinj e të reja, të vendosur për ta çuar këtë kauzë deri në fund, të bashkuar rreth një kauze të përbashkët kombëtare për të ardhmen e fëmijëve tanë. Protestuesit shprehen kundër kastës politike, duke thirrur në kor “opozita jemi ne” dhe duke kërkuar dorëheqjen e qeverisë.