Viti i Ri, në Kukës vjen me reshje dëbore. Bora ka filluar të bjerë në zonat malore mbi 700 metra mbi nivelin e detit, duke sjellë ulje të mëtejshme të temperaturave. Në zonat e thella malore termometri ka zbritur nga minus 3 deri në minus 16 gradë Celsius. Gjithashtu reshje bore janë shënuar edhe në afërsi të tunelit të Kalimashit, përgjatë Rrugës së Kombit, një aks i rëndësishëm për qarkullimin rrugor. Megjithatë, deri në këto momente, nuk janë krijuar shtresa që të pengojnë lëvizjen e automjeteve. Autoritetet bëjnë thirrje për kujdes, pasi gjatë dy ditëve të fundit Kukësi është përfshirë nga temperatura mjaft të ulëta.. Situata po monitorohet nga strukturat përkatëse, ndërsa drejtuesit e mjeteve këshillohen të tregojnë vëmendje të shtuar, sidomos gjatë orëve të natës dhe mëngjesit herët ku sygjerohet dhe mbajtja e zinxhinxirëve në automjete. Përgjatë ditëve të janarit pritet të kenë dhe një numër të lartë automjetësh që shkojnë drejt Kosovës për të pushuar në zonat turistike që preken nga bora.