Zjarret janë rikthyer këtë të diel në Krastë të Krujës, ku 5 vatra janë shfaqur njëkohësisht gjatë ditës. Të favotizuara nga era flakët rrezikuan dhe zonat e banuara. Për shuarjen e flakëve janë angazhuar forca zjarrfikëse nga Kruja, Kamza dhe Vora, ndërsa në operacion është përfshirë edhe një helikopter i Forcave Ajrore. Sipas burimeve nga bashkia e Krujës dyshohet për zjarrvënie të qëllimshme, ndërsa situata po shkon drejt normalizimit. Dy vatrat e fundit janë drejt shuarjes. Ndërkaq burime të tjera vendore bëjnë me dije se gjatë ndërhyrjes së zjarrfikësve, në Krastë, janë dëgjuar edhe të shtëna me armë zjarri, që dyshohet se kanë pasur qëllim pengimin e operacionit. Për rastin është njoftuar policia e Krujës, e cila po verifikon rrethanat dhe autorësinë e të shtënave. Zjarret kanë shkaktuar dëme në masivet pyjore të Krujës, veçanërisht në pisha, ullishte dhe dru frutorë. Ndërkohë, Zjarrfikësit, emergjencat civile dhe Forcat e Armatosura vijojnë angazhimin në disa zona të vendit për kontrollin dhe shuarjen e vatrave të zjarrit. Në malin e Çikës, mbi Palasë, zjarri është riaktivizuar dhe vijon në një terren të thepisur dhe të vështirë. Operacioni për shuarjen përfundimtare po mbështetet nga dy avionë Air Tractor. Në Pukë, në Prozhem, operacioni po vijon me 30 efektivë të Forcave të Armatosura. Sipas Ministrisē së Mbrojtjes, situata në Gojan–Gjegjan është përmirësuar ndjeshëm, me vatra të izoluara ose të fikura, të cilat mbahen nën mbikëqyrje.