Tri çifte lejlekësh janë rikthyer këtë pranverë në luginën e Drinos. Ngjarja sipas ornitologëve është me rëndësi të veçantë për habitatin e shpendëve të kërcënuar globalisht. Rikthimi i lejlekëve për të 7 vit rradhazi shihet si një tregues që flet për përmirësimin e situatës ambjentale të luginës reduktimin e pesticideve në tokat bujqësore dhe një balancë më të mirë mes aktivitetit human dhe jetës së egër. Biologu Lavdi Hasani ka kryer vëzhgime shumëvjeçare mbi jetën e shpendëve shtegëtarë në luginë. Ai beson se rikthimi i këtyre shpendëve pasuron ekosistemin dhe krijon premisa për shtimin e popullatës së kësaj specieje. " Një nga këto risi është kthimi në luginë i species së rrallë Ciconia Cinonia lejleku i bardhë i cili ka qenë shumë i përhapur në disa rajone të vendit mes të cilave edhe lugina e Drinos.Sivjet njohim tre çerdhe ose fole të lejlekëve, njëra prej të cilave pranë Viroit ku ata kanë lëshuar tashmë vezët. Ata prodhojnë 2-4 vezë por jo të gjitha arrijnë ti nxjerrin kështu që popullata e tyre akoma numërohet me gishta." Lugina e Drinos një korridor klasik për migrimin e shpendëve shtegëtarë është përballur për tri dekada me sfida serioze ambjentale të lidhura me ndotjen, shpyllëzimin, zjarret e gjuetinë çka kishte degraduar në masë bazën ushqimore dhe shanset e mbijetesës së shpendëve që folezojnë në luginë.