Plumbat përplaseshin sot nëpër ndërtesa teksa rezidentët largoheshin pë të shpëtuar nga përleshjet vrarëse në kryeqytetin e Libanit. Protestues të armatosur të mbështetur nga grupe militante si Hezbollah e Amal demonstronin kundër Tarek Bitar, gjyqtarit kryesor të çështjes së shpërthimit katastrofik në portin e qytetit. Beirut ngjasonte sot me një zonë lufte teksa autoblindat zbritën në zonat e ndara të qytetit. Ushtria tha se do të qëllonte ndaj çdo personi të armatosur ndërsa raportimet vendase flasin për të paktën 5 të vrarë. Tanke e autoblinda ishin dislokuar teksa të shtënat ishin përqendruar në një ndërtesë ku besohej se ishin strehuar militantët. Ushtria tha se zjarri i armëve kishte nisur kur demonstruesit kaluan në zonën ndarëse mes kristianëve dhe muslimanëve të qytetit. Ministria e brendshme e vendit tha se pesë njerëz janë vrarë nga zjarri, mes të cilëve dhe të qëlluar me snajperë. Disa të tjerë janë plagosur. Më herët kreu i grupit Hezbollah bëri thirrje për zëvendësimin e gjykatësit të shpërthimit masiv në portin e Bejrut, duke e akuzuar si të njëanshëm e te korruptuar.