Një ngjarje e rëndë ka tronditur qytetin e Korçës, ku 20-vjeçari Johan Zuko, ish efektiv i Forcave të Armatosura, ka mbetur i vrarë me armë zjarri. Si autor i dyshuar i këtij krimi është identifikuar shoku i tij i fëmijërisë Kristjan Sterjo, i cili është shpallur në kërkim policor. Ngjarja ndodhi në lagjen 15 të qytetit dhe dyshohet se shkak është një konflikt i i mëparshëm mes dy të rinjve i cili më pas është përshkallëzuar. Viktima ka tentuar t'i shpëtojë sulmit duke vrapuar drejt hyrjes së një pallati, por është ndjekur nga autori, i cili e ka qëlluar me armë zjarri automatike nga prapa gjatë ngjitjes së shkallëve dhe është larguar duke marrë me vete edhe armën e krimit. Johan Zuko vetëm 20 vjeç ka marrë një goditje me plumb në shpatull dhe ka gjetur vdekjen në sheshpushimin e katit të tretë të pallatit. Ndërkohë pak orë pas ngjarjes së rëndë forcat Renea kanë zbarkuar në Korçë dhe kanë nisur kërkimet. Kontrolle janë kryer në banesën e autorit dhe varrezat e qytetit, vende ku dyshohej se ai mund të ishte fshehur por ende nuk është bërë e mundur kapja e tij.