Më shumë se 300 persona humbën jetën nga tragjedia ajrore në Indi, ku avioni i Air India, një Boeing 787 Dreamline, që po fluturonte drejt Londrës, u rrëzua vetëm pesë minuta pas ngritjes në ajër nga qyteti indian i Ahmedabadit. Kjo është e dhëna më e fundit nga autoritetet indiane, raporton “The Guardian, ndërsa në bordin e avionit ndodheshin 242 persona, 169 pasagjerë indianë, 53 britanikë, një kanadez dhe 7 portugezë, mes të cilëve 11 fëmijë. Deri më tani, autoritetet njoftojnë për vetëm një të mbijetuar, një 40-vjeçar britaniko-indian, që jeton në Londër dhe ndodhej në Ahmedabad për të vizituar familjen, së bashku me vëllainë e tij, i cili po ashtu ndodhej në avion. Piloti dha alarmin SOS për një problem, dhe vetëm pak çaste pas ngritjes në ajër, pasi kishte kaluar perimetrin e aeroportit, avioni u përplas me një konvikt të studentëve të mjekësisë, duke iu marrë jetën edhe disa kalimatërve e studentëve, ndërsa dhjetëra të tjerë përfunduan në spital me plagë të rënda. Sipas faqes për gjurmimin e fluturimeve, Flightradar24, Boingu 787-8 Dreamliner është një nga avionët e udhëtarëve më modernë në përdorim. Aksidenti i fundit ajror në Indi ndodhi në vitin 2020 dhe përfshiu kompaninë Air India Express. Asokohe, avioni Boeing-737 doli jashtë një piste në Aeroportin Ndërkombëtar Kozhikode në Indinë jugore, rrëshqiti jashtë pistës, ra në një humnerë dhe u përplas me pjesën e përparme në tokë. Në atë aksident humbën jetën 21 persona.