Vala e të nxehtit që ka përfshirë Europën po sjell pasoja të rënda, duke shkaktuar viktima, probleme në sistemet energjetike dhe alarm të lartë për autoritetet në disa shtete. Në Itali, 16 qytete janë vendosur në alarm të kuq për shkak të temperaturave ekstreme, ndërsa deri tani janë raportuar të paktën pesë viktima të lidhura me të nxehtin. Autoritetet lokale kanë vënë në dispozicion të qytetarëve strehimore klimatike, hapësira publike dhe private ku mund të gjejnë freski gjatë orëve më të nxehta të ditës. Situata mbetet shqetësuese edhe në Spanjë, ku sipas të dhënave të fundit, 212 persona kanë humbur jetën gjatë ditëve të fundit si pasojë e temperaturave të larta. Një tragjedi është regjistruar edhe në Francë, ku një fëmijë trevjeçar u gjet i pajetë brenda një makine. Përballë situatës, autoritetet franceze kanë marrë masa shtesë. Duke nisur nga e premtja në mesditë, në Paris dhe disa zona të tjera do të ndalohet shitja dhe konsumi i alkoolit, një masë e ndërmarrë për të kufizuar rreziqet që lidhen me temperaturat e larta dhe sigurinë publike. Mbretëria e Bashkuar dhe Zvicra regjistruan të enjten temperaturat më të larta të qershorit. Temperatura e re e përkohshme prej 36.4°C në Somerset , tejkaloi rekordin e së mërkurës të qershorit prej 36.1°C në Hampshire. Në Zvicër, agjencia kombëtare e motit tha se temperaturat kishin tejkaluar 37 gradë Celsius për herë të parë në qershor, duke thyer një rekord të vendosur në vitin 1947.