OpenAI njoftoi se nga java e ardhshme do ta zgjerojë platformën e reklamave të ChatGPT në 31 vende europiane. Reklamat do t’u shfaqen vetëm përdoruesve të versioneve Free dhe Go, ndërsa abonimet Plus, Pro dhe Enterprise do të mbeten pa reklama. Në listën e tregjeve të reja përfshihen Gjermania, Franca, Spanja, Italia, Suedia, Norvegjia, Danimarka, Holanda dhe Austria. Fillimisht, bizneset do të mund të reklamojnë përmes ekipit të OpenAI dhe partnerëve të autorizuar. Mundësia për krijimin dhe menaxhimin e reklamave drejtpërdrejt nga reklamuesit pritet të hapet gjatë verës. Kompania thotë se reklamimi synon të financojë aksesin falas ose me kosto të ulët në ChatGPT dhe t’u mundësojë bizneseve të shfaqen në momentet kur përdoruesit kërkojnë, krahasojnë apo marrin vendime për produkte dhe shërbime. OpenAI garanton se bisedat do të mbeten private dhe nuk do t’u shiten reklamuesve të dhënat e përdoruesve. Reklamat do të etiketohen qartë, do të qëndrojnë të ndara nga përgjigjet dhe nuk do të ndikojnë në përmbajtjen e prodhuar nga ChatGPT. Përdoruesit do të kenë mundësi të kontrollojnë personalizimin e reklamave, ndërsa ata që nuk dëshirojnë t’i shohin mund të zgjedhin një nga planet me pagesë. Testimi i reklamave nisi në shkurt në Shtetet e Bashkuara dhe më pas u shtri në tetë tregje të tjera. Hyrja në 31 vende europiane përbën zgjerimin më të madh të platformës deri tani. Sipas OpenAI, dhjetëra mijëra kompani kanë reklamuar tashmë në ChatGPT.