Me objektivin për tu anëtarësuar në BE brenda 2030, sistemi arsimor shqiptar po përfshihet në një reformim kurrikular. Ministria e Arsimit ka firmosur programet mësimore të përditësuara, të cilat do të fillojnë të zbatohen duke nisur nga viti shkollor që vjen e do të zgjas 4 vite. Programi i ri do të prek fillimisht nxënësit e klasave të para e të gjashta në shkollat 9-vjeçare dhe klasave të dhjeta në gjimnaze në periudhën arsimore 2026-2027. Më pas, një vit shkollor më vonë do të hyjnë në fuqi ndryshimet për klasat e shtata dhe të njëmbëdhjeta. Përgjatë 2028-2029 do të zbatohen programet e rishikuara me koncepte të reja për klasat e dymbëdhjeta dhe parashikohet mbyllja e transformimit lëndor në vitin shkollor 2029-2030 për klasat e pesta. Duket se temat mësimore do të vazhdojnë njësoj për 5 grupmosha, klasat e dyta, të treta, të tetat dhe të nëntat. Kjo reformë vë në fokus jo vetëm lëndët kryesore si gjuha shqipe dhe matematika, por edhe lëndët me zgjedhje duke pasuruar programet e qytetarisë apo të lëndës së teatrit ku sugjerohet më shumë praktikë 60% se sa teori. Me përditësimin e programit synohet që klasa të shndërrohet në skenë ku të shfaqen e interpretohen vepra shqiptare apo botërore për të zhvilluar kreativitetin, komunikimin, vetëbesimin dhe ndjeshmërinë sociale të nxënësve, përmes eksperiencës teatrore. Mes programeve mësimore të përditësuara, dokumente të siguruara nga Top Channel, vihet re se një rëndësi e veçantë i kushtohet lëndës së qytetarisë.