Në Kosovë ka mbërritur varianti afrikan i koronavirusit; rastin e parë në vend të këtij mutacioni e konfirmoi Instituti Kombëtar i Shëndetësisë Publike atje, i cili shpjegoi se pacienti është shtruar në Klinikën Infektive të Prishtinës dhe po mbahet nën vëzhgimin e mjekëve. Në njoftim theksohet se nga ky moment do të gjurmohen të gjithë kontaktet e pacientit të prekur nga varianti i njohur si Beta nga Organizata Botërore e Shëndetësisë. Beta, i identifikuar për herë të parë në Afrikën e Jugut, është përhapur tashmë në 20 vende të botës.Nuk ka prova se ai shkakton sëmundje më të rëndë nga koronavirusi se variantet e tjera, por infektueshmërinë e ka më të lartë. Një ditë më parë u njoftua se edhe në Maqedoninë e Veriut është regjistruar rasti i parë i variantit Indian, të njohur si Delta. Personi i infektuar ishte kthyer nga Iraku, ku ka qenë i sëmurë për 10 ditë. Në momentin e kthimit, ai u transportua menjëherë në spital me një ambulancë speciale. Gjendja e pacientit është e qëndrueshme dhe jashtë rrezikut për jetën njoftoi Ministria e Shëndetësisë.