Raporti i Institutit për Studimet Politike mbi efikasitetin e deputetëve në sesionin e shkuar ka bërë një renditje të deputetëve më efikasë gjatë periudhës janar-gusht2024 dhe atyre “memece”. Referuar punës së tyre për nismat ligjore, për propozimet individuale, për pjesëmarrjen aktive në debatet në komisionet parlamentare dhe në seancat plenare, për interpelancat dhe pyetjet, deputetët më efektivë vijuan të jenë pothuajse të njëjtët si në sesionet e mëparshme parlamentare: Erion Braçe, Jorida Tabaku, Ina Zhupa, Bujar Leskaj, Petrit Vasili, Klotilda Bushka dhe Tritan Shehu. Deputetët e PSD vijojnë me rekorde negative (nën 13%) në fund të renditjes, kurse partitë e tjera kanë kuota nën 30%. Në raport theksohet se gratë deputete vijuan të shënojnë nivel shumë më të lartë angazhimi dhe efikasiteti sesa deputetët e gjinisë tjetër. Veç atyre efikasë gjatë periudhës janar-gusht 2024 kishte edhe disa deputetë “memecë”. Sipas raportit, në listë kryesojnë pothuajse të njëjtit deputetë si edhe në sesionet e kaluara parlamentare. Agron Çela, Gledis Çeliku, Gertjan Deda, Niko Kuri, Shkelqim Bullari dhe Tatiana Piro janë 6 deputetët më pak efikasë. Sipas raportit të Institutit për Studimet Politike, ata nuk kanë arritur të lënë “gjurmë parlamentare” në sesionin e fundit parlamentar, duke mos pasur asnjë angazhim personal në komisionet e Kuvendit dhe as në seancat plenare. Ata gjithashtu nuk kanë bërë asnjë propozim, nuk kanë folur për asgjë dhe nuk kanë ushtruar kështu pjesën më të madhe të detyrimeve kushtetuese dhe ligjore parlamentare.