Kryeministri Edi Rama prezantoi sot së bashku me zëvendëskryeministren, Belinda Balluku projektin “Korridori Blu”. Gjatë takimit Rama tha se projekti “Korridori Blu” do ketë dy autostrada të klasit A që kalojnë në korridore europiane. Kryeministri kritikoi qeverinë e mëparshme duke thënë se ka ndërtuar rrugë, por pa një projekt real dhe pa krijuar një rrjet rrugësh. “Ajo që dua të nënvizoj është se janë hapur tendera gjatë gjithë aksit nga Shkodra deri poshtë, por nuk është bërë kurrë një rrugë që të ketë lidhje me një korridor europian dhe është lejuar të pushtohet rruga nga çdokush. Në rrugën për Fier do detyrohemi ti shmangemi aksit aktual disa here sepse u ni s si autostradë, por ajo është rrugë rreziqesh. Tani do kemi dy autostrada të klasit A që janë korridor europian. Kur e lançuam Korridorin Blu talleshin me ne: Nuk di gjë piktori etj. Por kjo rrugë do rrisë ekonominë dhe është rrugë e domosdoshme duke qenë se në synojmë qartë të jemi shteti kampion i turizmit ne Ballkan”, tha Rama. Ai shtoi se të gjitha rrugët që janë ndërtuar në dekadën e fundit kanë krijuar një rrjet damarësh që i jep frymëmarrje të gjithë vendit. “Të gjitha këto rrugë janë vena dhe arterie që kemi ndërtuar gjithë këto vite, bëjnë sens sepse janë të gjitha të lidhura me njëra-tjetrën. Nuk është se kemi gjetur një shteg dhe i kemi futur një rrugë kot, për të marrë vota. Është një rrjet damarësh që i ka dhënë frymëmarrje gjithë vendit. Do të jetë një Zvicër, një Austri e Ballkanit sa i përket turizmit. I njëjti nivel. Por, kjo i takon dekadave të tjera”, u shpreh kryesocialisti.