Kryeministri Edi Rama zbuloi nga Elbasani mbështetjen financiare për të rinjtë, që arrin deri në 90 mijë euro dhe do të jepet përmes granteve. I pranishëm në aktivitetin e prezantimit të fituesve të programit kombëtar “Startup Albania” për vitin 2025 dhe aplikantëve të rinj për 2026-ën, kreu i qeverisë nënvizoi gjithashtu rolin e teknologjisë në transformimin e tregut të punës. “Projekte konsolidimi deri në 90,000 euro, që nuk janë kredi, por grant që qeveria shqiptare ia vë në dispozicion atyre që kanë ide dhe potencial për të krijuar një zgjidhje, një kompani të vogël e më pas të madhe. e do të rrisim dhe volumin e financimit për t’iu përgjigjur kësaj shpejtësie. Përfitoj nga rasti ta them këtë sot, të gjithë atyre që kanë aplikuar që ne nuk do të kufizohemi tek ai numri i fituesve të parashikuar sipas shifrave të dy viteve të kaluara, por do të bëjmë një ekstra financim në javët që vijnë dhe do të financojmë edhe aplikues të tjerë mbi atë shifër”. Ndërsa iu kërkoi të rinjve të mos ndalen përballë humbjeve, kryeministri Rama i drejtoi një mesazh thumbues dhe rivalit të tij politik, Sali Berisha, i cili në atë kohë po zhvillonte protestën në kryeqytet.