Kryeministri Edi Rama ka dhënë një intervistë të veçantë dhe ndryshe nga ato të formatit politik. Nga zyrat e NATO-s, kreu i qeverisë shqiptare është vënë përballë pyetjeve të tik-tokerit të njohur ukrainas, Max Klymenko, një sipërmarrës me bazë në Londër. Mes vlerësimeve për flamurin shqiptar, kryeministri vihet edhe përballë pyetjeve me peshë e rëndësi për vendin, ku ukrainasi i njohur e pyet se cili është kërcënimi më i madh për Shqipërinë. “Kërcënimi më i madh për Shqipërinë janë shqiptarët, në kuptimin që duhet të jemi të vetëdijshëm se kemi shumë punë për të bërë dhe duhet të vazhdojmë në drejtimin drejt Bashkimit Evropian. Dhe sapo të jemi brenda Bashkimit Evropian, do të jemi të sigurt edhe nga vetja jonë”. Me cilin lider botëror ka marrëdhënien më të mirë dhe më sfiduese? Kryeministri Edi Rama ka një emër për secilin rast. “Kam marrëdhënie të mira me të gjithë. Ndoshta marrëdhënia më e mirë është me Gjeorgjinë. Kemi gjithashtu një marrëdhënie të veçantë mes Shqipërisë dhe Italisë. Kam pasur një marrëdhënie shumë sfiduese me Mark Rutte kur ai ishte kryeministër i Holandës. Por më pas u bëmë miq shumë të mirë dhe kemi një miqësi të veçantë. Dhe ai është, pa diskutim, njeriu që di ta menaxhojë më mirë Donald Trump-in”. Një intervistë e shkurtër dhe e shpejtë për vështirësitë e punës si kryeministër, për profesionet që Rama ka pasur në jetën e tij, dhe që mbyllet me kërkesën e ‘tik-tokerit’ të njohur për një këshillë për të rinjtë. “Dëgjo, kur isha fëmijë, isha gjithmonë shumë, shumë në siklet kur duhej të merrja këshilla. Dhe kur u bëra i ri, i premtova vetes se sapo të bëhesha i rritur, nuk do t'u jepja kurrë këshilla të rinjve. Nuk është ide e mirë”. Max Klymenko u bë i njohur në platformat sociale TikTok dhe Youtube me serinë “Career Ladder”, ku përpiqet të zbulojë profesionin e njerëzve në rrugë brenda dy minutash. Ai është përfshirë në listën Forbes 30 Under 30 Europe (2024) dhe në vitin 2025 fitoi çmimin “Creator of the Year” në TikTok UK. Përveç videove për karrierën, ai flet edhe për biznesin, ekonominë, markat dhe çështje globale.