Aksidenti tragjik që i mori jetën dy fëmijëve në Durrës ka tronditur mbarë vendin. Kreu i Shtetit Bajram Begaj dhe kryeministri Rama reaguan duke ngushëlluar familjet, ndërsa kërkuan që për ngjarjen e rëndë të kryhet një hetim shterues. Presidenti Begaj përmes një statusi në rrjet tha se ishte i tronditur thellë për aksidentin e tmerrshëm në Durrës, ku humbën jetën dy vogëlushë dhe një tjetër u plagos shumë rëndë. “Lutem me përunjësi për shpirtrat e tyre! Ngushëllimet e mia më të sinqerta për prindërit dhe familjarët e dy engjëjve të vegjël. Uroj shërim për fëmijën që ndodhet i shtruar në spital. Institucionet përgjegjëse të marrin masa për rritjen e sigurisë në qarkullim, të bëjnë një hetim shterues për ngjarjen dhe qytetarët të rrisin përgjegjshmërinë për zbatimin e ligjit. Jeta dhe siguria e qytetarëve është e shenjtë”. Thotë presidenti në mesazhin e tij.