Kryeministri Edi Rama është takuar këtë të martë me ekipin ushtarak dhe civil të Misionit të Shqipërisë në NATO, si edhe me shqiptarët e që punojnë në zyrat qendrore të Aleancës së Atlantikut të Veriut. Rama deklaroi se të gjithë ata punojnë për të huajt, nuk duhet të çuditen në qoftë se do t'ju bëhet propozim për ti riintegruar në trupën e shtetit shqiptar dhe përfaqësuesit e shtetit shqiptar me paga të ngjashme. “Tani sigurisht që ambicia ime dhe ambicia jonë nuk mund të mos jetë që pjesën që na e kanë marrë të huajt, t’ua rimarrim. E di që kjo kërkon akoma më shumë punë, kërkon akoma ca kohë, sepse të huajt kanë një gjë që ne nuk e kemi akoma, që mund t’iu trajtojnë po kaq mirë sa ç’po ju trajtoj unë sot, por ndryshe nga unë që pasi t’ju uroj gëzuar Vitin e Ri do të largohem, ata kur largohen ju paguajnë shumë më mirë sa ç’mund t’ju paguajmë ne, kështu që këtë hendek ne jemi duke e zvogëluar, por është ende një hendek”. Rama dha edhe një mesazh për ta kur tha se misionin në NATO nuk duhet ta kenë privilegj, pasi ndodhen në këtë qendër globale të sigurisë, dhe punojnë për ditë në ambasadën më të madhe që ka Republika e Shqipërisë jashtë. “Qëndroni fort, mbani vendin e punës që e keni fituar me konkurse dhe me sprova dhe teste që pa diskutim janë shumë rigoroze. Jini krenar që kushedi se sa italianë, gjermanë, anglezë pa llogaritur edhe ata të tjerët që kemi rreth e rrotull, i keni lënë pa punë, se ju keni zënë vendin”