Paralelisht me protestat që po zhvillohen në Tiranë, edhe kryeministri Edi Rama vijon reagimet për investimin 4 miliardë euro, që sipas tij, do t’i japë zhvillim ekonomik gjithë vendin. Në reagimet e të shtunës, kryeministri Rama iu paraqiti qytetarëve rastin e suksesit të një iniciative të ngjashme në Katar. Rama publikon pamjet nga ishulli në Katar, që sipas tij, është është një ndër destinacionet turistike më të vizituara në Lindjen e Mesme, dhe është zhvilluar nga dy vëllezërit Alkhayatt, bashkëpronarët e konglomeratit Poëer Holding, blerësit e tokës private dhe bashkë-investitorët e projektit të Zvërnecit. “Tani kujt ia ha mendja se një kompani si Power Holding, vjen në Shqipëri të shkatërrojë reputacionin e vet me budallallëqet që thuhen për projektin, nuk kemi ç’i bëjmë. Po budallallëku që e ka lënë këtë vend mbrapa bote 100 vite, nuk ka për ta marrë dot peng Shqipërinë Europiane dhe Turistike”. Më herët gjatë të shtunës, kryeministri Edi Rama solli dhe një rast të ngjashëm investimi nga Portugalia. “Ria Formosa, në jug të Portugalisë, është një nga lagunat më të rëndësishme të Europës. Një peizazh unik me flamingo, shpendë migratorë, ishuj ranorë, dunat bregdetare dhe një biodiversitet të jashtëzakonshëm. Dhe pikërisht aty, në zemër të këtij peizazhi, Portugalia ndërtoi një nga historitë më të suksesshme të transformimit ekonomik në Europë. Shqipëria e rilindur turistike do hyjë me se s’bën në ligën e kampionëve të turizmit botëror dhe Europa e bota do të na vlerësojë përfundimisht si vend i bekuar, jo i mallkuar”.