Takimin e fundit në Tiranë para se të udhëtojë drejt Prishtinës, ndihmës sekretari i Shtetit për Byronë Ndërkombëtare të Narkotikëve dhe Çështjeve të Zbatimit të Ligjit, Todd Robinson e zhvilloi me kryeministrin Edi Rama, me të cilin diskutoi mbi rëndësinë kritike të forcimit të shtetit të së drejtës, rëndësinë e një gjyqësori të pavarur dhe çuarjen përpara të reformës në drejtësi. Gjatë këtij takimi, sipas njoftimit të ambasadës amerikane në Tiranë, Todd Robinson dhe kryeministri Edi Rama nënvizuan dhe bashkëpunimin e fortë mes Shteteve të Bashkuara të Amerikës dhe Shqipërisë. Ndërkohë detaje nga kjo bisedë zbardhi dhe ministrja e Shtetit për Marrëdhëniet me Parlamentin, Elisa Spiropali, e cila në një postim në Facebook e cilësoi një takim të shkëlqyer atë mes Robinson dhe kreut të qeverisë, Edi Rama. “Mirënjohje për partneritetin, bashkëpunimin e ngushtë dhe angazhimin e përbashkët për forcimin e sundimit të ligjit dhe suksesin e reformës në drejtësi. Rezultatet e institucioneve të reja të drejtësisë janë një inkurajim i madh për garantimin e pakthyeshmërisë së reformës drejt kontributit për një shoqëri më të drejtë dhe më të zhvilluar.”, shkroi Spiropali ndërsa nënvizoi se thellimi i bashkëpunimit dhe partneritetit strategjik mes dy vendeve mbetet një nga prioritetet e qeverisë shqiptare.