Kryeministri Edi Rama u rikthye pas disa muajsh mungese në seancën plenare të Kuvendit të Shqipërisë, vetëm një ditë pas pjesëmarrjes së tij në samitin e NATO-s të mbajtur në Hagë. Shefi i qeverisë u shfaq në sallën e Kuvendit në momentet e fundit të seancës, ku u miratuan me 74 vota disa projektligje ndersa gjate dites opozita denoncoi sipas saj farsen elektorale te zgjedhjeve te 11 majit e me pas bojkotoi votimin, me përjashtim të deputetit Dashnor Sula, i cili nuk iu bind urdhrit të Berishës duke qëndruar deri në fund. Gjatë kësaj seance u votuan disa projektligje vetëm me votat e mazhorancës socialiste. Ndër to përfshihej edhe paketa e ndryshimeve në ligjin për sportin, e cila shkaktoi debat mes deputetëve. Pavarësisht shumicës së nevojshme për miratimin, disa deputetë nga vetë radhët e Partisë Socialiste abstenuan nga votimi. Deputetët Erion Braçe dhe Petro Koçi, të dy nga PS, zgjodhën të abstenojnë. Gjithashtu, deputeti i Partisë Demokratike, Dashnor Sula, dhe Meri Markiçi nga Partia eSocialdemokrate, abstenuan në votim. Ndërkohë që kjo legjislaturë parlamentare po shkon drejt fundit opozita u kujtua të sjellë në parlament zgjedhjen e avokatit të ri të popullit.