Kryeministri Edi Rama do të respektojë vendimin e Gjykatës së Lartë që lë Erion Veliajn në masën e arrestit me burg, duke lejuar vazhdimin e drejtimit të Bashkisë së Tiranës nga qelia. Ndonëse kreu i qeverisë e komentoi qëndrimin e gjyqtarëve si të paprecedentë dhe në dëm të banorëve të kryeqytetit, Rama u shpreh se është i detyruar të zbatojë vendimarrjen e Gjykatës. “Përsëri Tirana pa kokë dhe përsëri kryetari i zgjedhur e i pagëzuar rishtaz nga vetë Kushtetuesja si i vetmi në detyrë dhe i palëvizshëm nga detyra, nuk mund të lëvizë nga qelia ku mbahet pa gjyq! Po, rregulli e do që vendimet e gjykatave të respektohen dhe unë i nështrohem gjithnjë këtij rregulli - madje as nuk i komentoj vendimet përpara formës së prerë”. Në një reagim në rrjetin X, Edi Rama e sheh vendimin e Gjykatës së Lartë të paarsyetur mbi rrezikun e gjykimit në paraburgim, teksa koston e paguan kryeqyteti. “Por, përtej faktit që kalvari i Erion Veliajt është unikal në historinë e Europës demokratike dhe gjithashtu faktit që ende nuk shihet gjëkundi prova e rrezikshmërisë ekstreme, e cila mund të arsyetojë kyçjen e pambarimtë në qeli të një të zgjedhuri nga populli, ka një të vërtetë tjetër të hidhur: Askush s’po do t’ia dijë për koston përditë e më të lartë të të parit kryeqytet në botë, që prej thuajse dy vjetësh jeton me kokë të prerë dhe për haraçin që thuajse 1 milionë banorë duhet t’i paguajnë përditë këtij eksperimenti të paparë e të padëgjuar juridik, social dhe ekonomik”.