Kryeministri Edi Rama ka reaguar pas komenteve të ish-drejtorit ekzekutiv të Google, Eric Schmidt, i cili e përshkroi ministren e inteligjencës artificiale “Diella” si një hap drejt “algokracisë”, apo qeverisjes nga algoritmet. Në një editorial tw publikuar në “New York Times”, Rama kundërshton hapur këtë përshkrim, duke e cilësuar Diellën si një mjet që forcon, dhe jo që e zëvendëson demokracinë. Kam shumë respekt për z. Schmidt. Lidershipi e tij në Google dhe idetë e tij mbi marrëdhënien midis teknologjisë dhe shoqërisë kanë frymëzuar një brez të tërë politikëbërësish, përfshirë edhe mua. Por si kryeministër i Shqipërisë, u zhgënjeva kur lexova përshkrimin e tij për Diellën, nismën shqiptare të qeverisjes me A.I., si “një hap drejt ‘algokracisë’: qeverisjes nga algoritmet”. Ai shton se transparenca dhe efikasiteti nuk janë “algoritme”, por vlera të demokracisë të cilat teknologjia mund t’i zbatojë me saktësi dhe pa ndikim politik. “Diella nuk është as sunduese dhe as zëvendësuese e demokracisë. Ajo është një shërbyese civile digjitale, një kujdestare publike e konceptuar për ta bërë demokracinë të funksionojë më mirë dhe shërbimet publike më të shpejta, më të drejta dhe më transparente.Për dekada me radhë, Shqipëria, si shumë demokraci të reja, është përballur me korrupsion në prokurimet publike. Kur rregullat shkelen, nuk janë algoritmet që dështojnë, por njerëzit”. Rama mbyll reagimin duke theksuar se Shqipëria nuk po krijon një “algokraci”, por një demokraci digjitale, ku teknologjia përdoret për t’u shërbyer njerëzve dhe jo për t’i zëvendësuar ata.