“Një ditë të mirë për të vërtetën” e cilësoi kryeministri Edi Rama vendimin e Gjykatës së Apelit për dënimin e deputetit Ervin Salianji. Në një reagim në rrjetet sociale, kreu i qeverisë tha se inskenimi kundër drejtuesit të procesit të Reformës në Drejtësi dhe vetë Partisë Socialiste, mori sot përgjigje nga drejtësia e re. “Në këtë vend ku për 34 vjet nuk ka mbetur i gjallë e i vdekur pa u ndotur nga llumi i lumit të atyre jashtënxjerrjeve të përditshme, e ku gjyqet e panumërta për shpifje ndaj politikanëve zgjasin me vite të tëra e pastaj kthehen në pesë me hiç, sot u ushtrua për herë të parë nga gjykatat e vendit e drejta e sanksionuar në ligj për dënimin penal të kategorisë më të neveritshme të shpifjes, kallzimit të rremë, lidhur me një histori që përpara disa vjetësh tronditi mbarë opinionin publik përmes një inskenimi kriminal kundër drejtuesit të procesit të Reformës në Drejtësi dhe vetë Partisë Socialiste, si forca udhëheqëse e asaj reforme që prodhoi armiqësinë e paepur të politikanëve të trembur nga një Drejtësi e Re, e cila ka lindur e po rritet më në fund jashtë duarve të politikës që e kontrolluan drejtësinë qysh prej shpalljes së shtetit të pavarur shqiptar, ku kurrë asnjëherë një individ me pushtet politik nuk u dënua nga një drejtësi e pavarur, deri kur Drejtësia e Re filloi të godasë majtas e djathtas.” Teksa e cilësoi opozitën si “Mbretëria e vetëshpallur e Shpifarakëve”, kryeministri Rama tha se Partia Socialiste nuk do të tërhiqet nga proceset gjyqësore ndaj politikanëve që shpifin. “Nuk do të jemi kurrë gati të tërhiqemi nga proceset gjyqësore kundër shpifësve të veshur me kostume e flamuj partiakë dhe të armatosur me urrejtjen përçarëse e atdhenxirëse, që prej 34 vjetësh prodhon jashtënxjerrjet më të neveritshme të gojës. Padiskutim që kjo është një luftë krejt e pabarabartë, ku në këtë rast shumica qeverisëse është një pakicë e papërfillshme përballë maleve e lumenjve të shpifjes, por ne nuk do ta pranojmë kurrën e kurrës mbretërinë paralele të shpifarakëve si një pasojë fatale të bashkëjetesës në një shtet demokratik.”