Kryeministri Edi Rama ka konfirmuar se do të kandidojë për mandatin e katërt. Në një intervistë për “Reuters” shefi i qeverisë shpjegon edhe arsyet e këtij vendimi. “Plani është të kandidoj. Unë besoj se duhet të kandidoj, sepse ka punë për të përfunduar. Në këto tre mandate, ne kemi bërë gjëra të mahnitshme. Shqipëria ishte vetëm një lajm i keq kur bëhej fjalë për lajme, por tani kemi kapërcyer tavanin e 10 milionë turistëve në një vend ku turizmi ishte një ide e mire, por nuk ishte bërë ende realitet. Ka ende shumë gjëra për t’u bërë, siç është lufta kundër korrupsionit që duhet të jetë një luftë e pakthyeshme” Në prag të hapjes së kampit në Gjadër, kryeministri shqiptar hodhi poshtë çdo mundësi për një marrëveshje me një shtet tjetër të BE-së përveç Italisë, për pritjen e emigrantëve. I pyetur nëse një marrëveshje e tillë ishte e mundur edhe me Gjermaninë, ai tha se aktualisht nuk ka kapacitet të mjaftueshëm dhe se Gjermania duhet të gjejë një partner tjetër. Rama mori pjesë në Procesin e Berlinit me liderët e Ballkanit Perëndimor dhe përfaqësues të BE, ndërsa Shqipëria kërkon anëtarësimin në Bashkimin Evropian 2030-ën. “Një marrëveshje e zgjeruar e Tregtisë së Lirë të Evropës Qendrore për rajonin e Ballkanit Perëndimor është e arritshme. Do të jetë e rëndësishme të rregullojmë mekanizmin e CEFTA-s”. Kancelari Scholz do të bisedojë me Shqipërinë, Bosnjën, Kosovën, Malin e Zi, Maqedoninë e Veriut dhe Serbinë në negociatat që u nisën në 2014 me synimin për të integruar rajonin në politika më të përputhshme me BE-në.