Kryeministri Edi Rama ka komentuar protestat në Tiranë, që vijojnë prej më shumë se dy muajsh, duke thënë ato nuk janë të njëjta me ato të muajit qershor. Në një intervistë për median britanike “UnHerd”, kreu i qeverisë është shprehur se në protestat e fundit në kryeqytet janë përfshirë më shumë parti politike dhe grupe të opozitës, si dhe forca të ekstremit të majtë dhe të djathtë. Kryeministri hodhi poshtë gjithashtu idenë se protestat përfaqësojnë të gjithë shoqërinë shqiptare. “Protestat e sotme nuk janë protestat e qershorit, kështu që njerëzit që flasin tani, janë të ndryshëm. Ata janë të angazhuar në parti politike. Ata janë të angazhuar në parti opozitare, parti të vogla opozitare, të majtë nga ekstremi dhe të djathtë nga ekstremi. Ndërsa protestat e qershorit ishin të ndryshme, ishin më të mëdha, shumë njerëz që votuan për ne ishin atje. Sidoqoftë, jam shumë, shumë krenar që kemi pasur një protestë kaq të madhe për ditë të tëra në një mënyrë shumë paqësore, dhe se askush nuk u lëndua, askush nuk u ndalua të bënte atë që donte. Në fund të fundit, kjo protestë tregon një vend që është si një vend normal evropian, ku ka protesta”.