Kryeministri Edi Rama përsëriti nga Gjermania se protestat në Shqipëri dhe gjithë buja ndërkombëtare për investimin në Sazan e Zvërnec ka në fokus presidentin amerikan, Donald Trump. Në një intervistë për Agjencinë Gjermane të Shtypit (DPA), kreu i qeverisë shqiptare hodhi poshtë kritikat për planet e resortit luksoz lidhur me dhëndrin e presidentit amerikan, Jared Kushner, teksa theksoi se Sazani nuk është shitur dhe ishullin nuk e ka marrë familja e presidentit amerikan. Rama tha se qeveria e tij është ende në negociata për një sipërmarrje të përbashkët biznesi, për ndërtimin e një resorti luksoz në Ishullin e Sazanit, në vlerën e 1.4 miliardë eurove. “Shqipëria është shndërruar në një platformë për gjithë zemërimin anti-Trump në mbarë botën. Faktet tregojnë se nuk ka asnjë marrëveshje për Ishullin e Sazanit. Janë të gjitha gënjeshtra”. Sa i përket investimit 4 miliardë euro në Zvërnec, që u bë shkak për nisjen e protestave në Tiranë, që vijojnë prej më shumë se dy javësh, kryeministri Rama u shpreh për median gjermane se punimet paraprake në këtë zonë janë pezulluar përkohësisht, për shkak të “presionit”, por shtoi se projekti do të ecë përpara deri në fund. Agjencia Gjermane e Shtypit i përmendi kryeministrit Rama kritikat nga grupet mjedisore në vend mbi ndryshimet në ligjin shqiptar për zonat e mbrojtura, të miratuara në vitin 2024. “Qeveria i ka përshkruar këto ndryshime si një sqarim të statusit të mbrojtjes së zonave, por Bashkimi Evropian ka deklaruar se amendamentet kanë dobësuar mbrojtjen mjedisore”, shkruan media gjermane, por ky vlerësim hidhet poshtë nga kryeministri.