Kryeministri Edi Rama u pyet për investimin 4 miliardë eurosh në Zvërnec në Forumin Botëror ‘Future Investment Initiative”, që u mbajt në Itali, prej ku përsëriti bindjen se projekti do të realizohet, pavarësisht bujës brenda e jashtë vendit. Edhe nga Italia, kreu i qeverisë shqiptare drejtoi gishtin nga Irani për protestat që po mbahen në Tiranë, ndërsa e lidhi sërish reagimin ndërkombëtar me presidentin amerikan, Donald Trump. “Indinjata digjitale sigurisht që është provokuar më së shumti edhe për shkak të faktit që është Kushneri e Trumpi e gjithë hijet pas që mund t'i bëjë shumë njerëz nga të gjitha anët, nga të gjitha kontinentet e vendet që të hidhen menjëherë, por sasia e gënjeshtrave, e videove të rreme, e videove të marra nga protesta në vende të ndryshme dhe të shfaqura si video të protestave në Shqipëri, numri i robotëve të angazhuar dhe të përfshirë te armiku, sepse ne kemi një armik, kemi një armik të vetëm që është Republika Khomeiniste e Iranit, dhe ata kanë qenë qysh prej tre vitesh të angazhuar në një sulm të pamëshirshëm kibernetik kundër Shqipërisë dhe kanë hyrë dhe ata në lojë”. Kryeministri Rama debatoi me gazetaren e CNN, Eleni Giokos, teksa kjo e fundit e pyeti për blerjen e tokës në Zvërnec nga investitorët.