Kryeministri Edi Rama në një reagim për Financial Times ka deklaruar se Shqipëria ndodhet në një moment të rëndësishëm me BE drejt objektivit të anëtarësimit. “Ne kemi një rrugë të qartë drejt Bashkimit Evropian. Shqipëria është në momentin më të mirë në shumë aspekte”, është shprehur Rama për median britanike. Në artikullin “O tani o kurrë” A e mendon seriozisht BE pranimin e anëtarëve të rinj?, Financial Time bën një analizë të vendeve kandidate që aspirojnë mbylljen e negociatave. Në shkrim vecohet se Shqipëria ka avancuar në procesin e reformave për afrimin me Bashkimin Evropian. Por thuhet se në Ballkanin Perëndimor, përveç Malit të Zi dhe Shqipërisë, vendet e tjera kandidate si Serbia, Maqedonia e Veriut, Bosnje-Hercegovina dhe Kosova kanë shënuar më pak përparim vitet e fundit. Më tej, në analizë specifikohet se Mali i Zi, vendi që konsiderohet më pranë anëtarësimit, ka përfunduar më shumë se gjysmën e reformave të kërkuara për hyrje në BE.