Nisma e qeverisë për Paketën e Maleve, që synon zhvillimin ekonomik të zonave malore, po ngjall interes të lartë te qytetarët. Kryeministri Edi Rama ka publikuar një hartë, që tregon se vetëm në 5 ditë janë bërë 787 aplikime. Kryeministri fton të gjithë shqiptarët, brenda dhe jashtë vendit, që të aplikojnë, pasi do të kenë mbështetjen e qeverisë për të bërë biznes. “Kjo është një hartë frymëzuese e aplikimeve për Paketën e Maleve, ku në vetëm 5 ditë numërohen 787 aplikantë. Të gjithë emigrantët posaçërisht, po edhe të gjithë ata që jetojnë në Shqipëri e duan të rihapin derën e shtëpisë së të parëve në mal a në zonat kodrinore të vendit, për një bujtinë, një agroturizëm, një hotel malor, një fermë apo një linjë agropërpunimi, janë të ftuar të aplikojnë dhe ndërtojnë ME LEJE, duke përfituar nga mbështetja e qeverisë dhe linja e kredisë së butë të Bankës së Shqipërisë”.