Palestinezë në Shqipëri? Jo gjatë qeverisjes socialiste. Gjatë konferencës së sigurisë në Mynih, kryeministri Edi Rama është treguar i prerë në panelin me në qëndër diskutimi “ lufta në Gaza dhe konflikti Izrael Palestinë”, se nëse do të kishte një shtrirje dore për bashkëpunim nga administrata amerikane, përgjigja do ishte negative. Idea e presidentit Donald Trump që konfirmoi në një deklaratë për shtyp ditë më parë se Shqipëria është pjesë e listës së vendeve që po merr në konsideratë për dërgimin e refugjatëve palestinezë, sipas kryeministrit Rama nuk është zhvilluar më tej, sepse nuk ka ende një kërkesë për strehim në territorin shqiptar; por edhe nëse në të ardhmen do të ndërmerret ky hap nga Trump, shteti shqiptar do të refuzojë. Mediat që ndoqën aktivitetin e pasdites së të shtunës në Gjermani raportojnë se Rama nisi fjalimin me një habi “Nuk kuptova pse më kërkuat dëshpërimisht që të isha pjesë e këtij paneli për Lindjen e Mesme”. Tema me titull “Përtej konfliktit: Vlerësimi i rrugëve dhe pengesave që çojnë drejt paqes së qëndrueshme në Lindjen e Mesme” kishte të pranishëm personalitete të politikës, të botës akademike apo të shoqërisë civile. Paneli përfshiu dhe diskutimin për strehimin e mundshëm të palestinezëve në Shqipëri si propozim i Trump, por që Rama tha se kjo nuk ka për të ndodhur. “Asnjë nuk na ka pyetur nga administrata Trump por dhe nëse do të na pyesin – çka nuk është e logjikshme, sepse ne jemi në mes të Europës dhe si mund të vijnë tek ne qindra-mijëra vetë… – gjithsesi kjo është pjesë logjistike dhe ne jemi një vend i vogël. Por kjo nuk ka për të ndodhur, të paktën jo gjatë qeverisjes sime” – ishte qëndrimi i Ramës.