Edi Rama, nga Korça, tha se Partia Socialiste e ka çuar Shqipërinë më lart në rrugën drejt zhvillimit dhe integrimit europian, duke e cilësuar këtë si një amanet ndaj të parëve dhe detyrim ndaj brezave të rinj. Ai theksoi krenarinë për rolin e PS në forcimin e marrëdhënieve me faktorin ndërkombëtar dhe përmirësimin e imazhit të Shqipërisë në botë. Rama u ndal edhe te procesi i integrimit europian, duke deklaruar se Shqipëria ka hyrë në një fazë të re pas hapjes së kapitujve të negociatave dhe tashmë po ecën drejt mbylljes së tyre. Në fund, ai e konsideroi shiun gjatë aktivitetit si shenjë bereqeti dhe paralajmëroi një fitore të madhe të PS në zgjedhjet e ardhshme. “PS e ngjiti Shqipërinë edhe një majë më lart, në rrugën drejt majës që faktikisht është amaneti nga të parët dhe borxhi që u kemi fëmijëve tanë. Ne do të vendosim me së bashku flamurin kuq e zi të Ismail Qemalit dhe Gjergj Kastriotit në këtë majë të lartë. PS ka dëshmuar se është e vetmja forcë politike që mund të ketë një raport të drejtë me faktorin ndërkombëtar, me të shkuarën edhe me botën. Është krenaria jonë që pas një periudhe të gjatë vështirësish dhe denigrimi i kemi ngritur kokën çdo shqiptari kudo në botë. Mbi të gjitha është krenaria jonë që sot Shqipëria ndodhet në një fazë tjetër, pasi kemi mbyllur fazën e çeljes së të gjitha kapitujve të negociatave, tani kemi hapur procesin e mbylljes së gjithë kapitujve. Ndërsa shiu filloi duke dëgjuar se ç’ishte Shqipëria, le të vazhdojë si bereqeti që do të kemi dhe le të bjerë mbi këtë festë të 35-vjetorit të PS edhe këtu në Korçë, duke paralajmëruar një fitore të jashtëzakonshme si ajo që do realizojmë të gjithë bashkë në zgjedhjet e vitit të ardhshëm”, tha Rama.