Krerët e BE-së janë mbledhur në Londër për samitin e Bashkësisë Politike Europiane, ku i pranishëm është edhe kryeministri Edi Rama, i cili bashkë me homologen italiane drejtojnë një tryezë me temë për emigracionin, ndërkohë që dy vendet kanë arritur marrëveshje për të strehuar në tokën shqiptare emigrantë që mbërrijnë në Itali në mënyrë të paligjshme, teksapprocesohen kërkesat e tyre për azil. Në focus të bisedimeve në takimin e drejtuesve të bllokut në Britaninë e Madhe që vjen një javë pas samitit të NATO-s eshte lufta në Ukrainë, siguria dhe demokracia, ndërsa për herë të parë kjo mbledhje do të drejtohet nga kryeministri i ri Britanik Keir Starmer. Në takim mbahen dy tryeza të rrumbullakëta, një për emigracionin e paligjshëm dhe një tjetër për mbrojtjen e demokracisë. Pak përpara nisjes së punimeve të samitit, Rama u takua me kryeministrin grek Kyriakos Mitsotakis. Fotot e bisedës mes dy zyrtarëve, janë publikuar nga ministrja Elisa Spiropali e pranishme gjithashtu në Mbretërinë e Bashkuar për Samitin e Komunitetit Politik Europian. Në foton familjare të samitit, Rama u shfaq duke pozuar në krah të presidentit ukrainas, Volodymyr Zelenskyy dhe kryeministrit britanik Starmer. Në fjalimin e tij, Starmer ishte shprehur se detyra kryesore sot është siguria europiane dhe se të gjithë duhet të punojnë në këtë drejtim. Ai përshëndeti Zelensky për përpjekjet e tij për të mbështetur vlerat europiane, duke i thënë se do të qëndrojnë pranë vendit të përballur me agresionin rus prej tre vitesh tashmë, ndërsa theksoi gjithashtu se kërcënimi nga Rusia po prek të gjithë Europën, për të cilën tha se duhet të qëndrojë e bashkuar në mënyrë që të ruajë kufijtë e saj.