“The Financial Times” i ka kushtuar një artikull situatës në veri të Kosovës pas ngjarjes së rëndë të 24 shtatorit ku mbeti i vrarë polici i Kosovës Afrim Bunjaku nga një sulm i paraushtarakëve serbë. Në shkrimin e gazetarit Marton Dunai, citohet edhe një deklaratë e kryeministrit Edi Rama që e përshkruan Kosovën si një pikë të nxehtë. Uljen e tensioneve, sipas Ramës e ka në dorë NATO, që sipas tij “duhet të rivendosë kontrollin e veriut të Kosovës ose të përballet me dhunën e vazhdueshme midis serbëve etnikë dhe shqiptarëve në rajon”, “The Financial Times” shkruan më tej se pas situatës në veri NATO do vendosë më shumë trupa paqeruajtëse me qëllim uljen e tensioneve. Sipas gazetës, Kosova ka fajësuar Serbinë për sponsorizimin e sulmit dhe për lëvizjen e njësive të ushtrisë afër kufirit të Kosovës, në atë që tregonte qëllime luftarake. Nga ana tjetër, Beogradi mohoi të kishte organizuar plane të tilla. “The Financial Times” shkruan ndër të tjera se Rama kishte tërhequr vëmendjen për përkeqësimin e situatës së sigurisë në Kosovë gjatë një samiti të NATO-s, në korrik. “Qëllimi ishte njohja e plotë e Kosovës në BE dhe në Kombet e Bashkuara. Nuk është e lehtë të ndryshosh rrjedhën e historisë, kjo kërkon lidership”, theksoi kryeministri për gazetën. “Paqëndrueshmëria në Ballkanin Perëndimor i shërben interesave të Moskës. Kremlini do të dëshironte gjithashtu të shihte një Donbas të vogël në Kosovë dhe të ndizte një zjarr separatizmi në mes të Evropës”, tha Rama ndër të tjera.