Kryeministri Edi Rama mbërriti mbrëmjen e të hënës në Bruksel, ku u prit në takim nga presidenti i Këshillit Evropian, Antonio Kosta. Bisedimet mes kreut të qeverisë shqiptare dhe zyrtarit të lartë evropian do të fokusohen në procesin e negociatave për anëtarësimin e Shqipërisë në Bashkimin Evropian. Shqipëria nuk ka marrë ende Raportin e Vlerësimit të Standardeve për Reformimin e Gjyqësorit për kapitujt 23 e 24 i quajtur IBAR. Pa miratimin e këtij raporti nga shtetet anëtare, nuk mund të nisë procesi i mbylljes së grupkapitujve. Kapitujt 23-24 mbi gjyqësorin u hapën të parët dhe mbyllen të fundit në procesin e negociatave. Më herët, gjatë të hënës, kryeministri Rama mblodhi grupin parlamentar të Partisë Socialiste, me fokus kryesor vendimin e gjykatës për pezullimin e zëvendëskryeministres Belinda Balluku. Rama paralajmëroi zgjidhjen e çështjes përmes ndryshimeve ligjore.