Me këtë vlerësim, kryeministri Edi Rama i dorëzoi dekoratën “Ylli i Oficerit të Urdhrit Suprem të Shqiponjës” violinistit Tedi Papavrami, përmes një delegimi të posaçëm nga Presidenti Bajram Begaj. Kryeministri Rama vlerësoi punën e artistit Papavrami në promovimin e Shqipërisë dhe shqiptarëve në mbarë botën. “Falë Tedit ne kemi sot sharmin e Europës, ashtu si e kemi ëndërruar dhe dashur gjithmonë. Dua t’i them Tedit faleminderit shkoi në Europë si një shqiptar i bukur, kur për Europën shqiptarët ishin njerëz me bisht. Por gjithashtu faleminderit Europës që gjatë kësaj jave na sollën Tedin në Shqipëri. I dashur Tedi, unë e konsideroj veten me fat që të njoh”. Ndërsa Papavrami gjatë fjalës së tij kujtoi njohjen e hershme me kryeministrin Edi Rama, ndërsa foli edhe për historinë e tij artistike në Shqipëri. “Ti vetë Edi je pjesë e kujtimeve të hershme, ku unë të mbaja mend si një adoleshent më të rritur që më impresiononte dhe më dukej gjithmonë një figurë mbrojtëse për mua kundër rrugaçëve. Historia ime në këtë vend ka qenë sipas epokave shumë kontradiktore. Kam njohur dashamirësinë dhe admirimin e publikut, por edhe dhunën e refuzimit”.