Teksa ndodhemi vetëm pesë ditë para zgjedhjeve parlamentare të 11 Majit, tregjet ndërkombëtare parashikojnë fitoren e Edi Ramës, në mandatin e tij të katërt qeverisës. Polymarket, platforma më e njohur e tregjeve të parashikimeve në botë, nxjerr kryesocialistin Edi Rama fitues të zgjedhjeve të së dielës. Sipas të dhënave në kohë reale të Polymarket, që është një prej treguesve më interesant ndërkombëtar për zhvillimet politike, gjatë këtyre ditëve të muajit maj, Partia Socialiste e drejtuar nga Edi Rama regjistron një rritje të ndjeshme. Të dhënat e Polymarket, tregojnë se 97% e përdoruesve të kësaj platforme besojnë se Partia Socialiste dhe Edi Rama fitojnë zgjedhjet e 11 Majit. Polymarket është një platformë e decentralizuar që funksionon në bazë të teknologjisë blockchain dhe që i lejon përdoruesit të investojnë mbi rezultatet e ngjarjeve reale – nga politika te sporti dhe ekonomia. Çmimet ndryshojnë në kohë reale bazuar në ofertë dhe kërkesë, duke reflektuar perceptimet e tregut mbi zhvillimet më të fundit. Kjo e bën Polymarket një barometër të fuqishëm për pritshmëritë ndërkombëtare. Parashikimet e platformës Polymarket përputhen edhe me gjetjet e sondazheve të publikuara javët e fundit nga Top Channel, në bashkëpunim me ekspertin amerikan të sondazheve, John McLaughlin, që nxirrnin fituese Partinë Socialiste të Edi Ramës.