Kryesocialisti Edi Rama bëri bashkë mbrëmjen e kësaj të mërkure të rinjtë e tre njësive në kryeqytet, ku ju kërkoi votën më 11 Maj. Sipas Ramës, shqiptarët duhet të votojnë Partinë Socialiste për të ardhmen evropiane. “Pse duhet votuar PS? Po kë tjetër mër jahu! Sa herë PS ka marrë drejtimin, vendi ka qenë më mirë se kur e ka marrë PD. Partia Socialiste është këtu për të ndërtuar, të tjerët janë për të shkatërruar. Rama nuk i kurseu batutat me vajzat që votojnë për herë të parë, teksa iu kërkoi të përdorin fuqinë tërheqëse për të bindur djemtë e lëkundur që të votojnë për PS më 11 maj. "Kur ju të merrni pasaportën në dorë, do thoni e kam dhe unë qepallën time këtu te kjo pasaporta. Kurse ata do shohin pasaportën dhe do thonë “rroftë dashnorja ime se të ishte për mua nuk do futesha kurrë në BE. Kështu që fuqinë tuaj tërheqëse mbi ata djem të lëkundur duhet ta vini në dispozicion të atdheut për të votuar në 11 maj për PS”. Kryesocilisti e quajti qesharake sloganin e Partisë Demokratike në këto zgjedhje parlamentare. “Si do ta bëjnë madhështore? Shqipërinë nuk kemi nevojë ta bëjmë "madhështore", sepse kjo tingëllon shumë qesharake kur e themi. Ne, Shqipërinë, do ta bëjmë anëtare të Bashkimit Evropian” Në takimin me votuesit për herë të parë të njësive 1, 2 dhe 3 në Tiranë, Rama tha se Shqipëria duhet të mbyllë negociatat me BE deri në 2027.