Kryeministri Edi Rama ndodhet në New York, aty ku ka takuar Ministrin e Industrisë dhe Teknologjisë së Avancuar të Emirateve të Bashkuara Arabe, Sulltan Ahmed Al Jaber. Ndërsa e quan një mik të çmuar, Rama shkruan se kanë biseduar për dy projekte të mëdha të energjisë që po finalizohen mes dy vendeve. Një ndër to është krijimi i një kompanie të përbashkët të prodhimit energjetik KESH&MAZDAR, ndërsa tjetra është ndërtimin e linjës nënujore të transmetimit të energjisë me Italinë, në një bashkëpunim tripalësh Shqipëri-EBA-Itali. “Me mikun e çmuar Sultan Ahmed Al Jaber, Ministër i Industrisë dhe Teknologjisë së Avancuar të Emirateve të Bashkuara Arabe, për dy projektet e mëdha të energjisë që po finalizojmë bashkarisht, krijimin e kompanisë së përbashkët të prodhimit energjitik KESH&MAZDAR, e cila do të ketë një portofol të ri ambicioz investimesh në Shqipëri e në rajon dhe së dyti, ndërtimin e linjës nënujore të transmetimit të energjisë me Italinë, në një bashkëpunim tripalësh Shqipëri-EBA-Itali”. Kryeministri Edi Rama deklaroi në fjalën e tij një ditë më parë në selinë e OKB se “teknologjia dixhitale është bekim për vendet në zhvillim”, duke vënë në dukje faktin se 95% të shërbimeve tani në Shqipëri kryhen online.