Kryeministri Edi Rama reagoi sërish ndaj atyre që vunë në dyshim renditjen e Shqipërisë në krye të indeksit global të sigurisë kibernetike. Kreu i qeverisë publikon një shkrim të medias së njohur pan-europiane “Euronews”, që pasqyron klasifikimin dhe transformimin e Shqipërisë pas sulmit kibernetik të vitit 2022. "Ja edhe EURONEWS-i global për një lajm që në Shqipëri i mërziti aq shumë sorrat, korbat dhe dështak-zemërakët. Shqipëria e para në botë për sigurinë kibernetike. Sulmi i vitit 2022 mund të na kishte gjunjëzuar. Ne e kthyem atë në një shtysë për transformim. Dhe sot, në një kohë kur Shqipëria digjitale ofron online 95% të shërbimeve publike, kjo mburojë është po aq jetike sa çdo infrastrukturë tjetër strategjike e vendit”. Në artikullin e Euronews theksohet se Shqipëria mori pikët maksimale në të gjithë treguesit strategjikë, përfshirë politikat kibernetike, bashkëpunimin ndërkombëtar, arsimin dhe kërkimin, si edhe në treguesit parandalues, si mbrojtja e infrastrukturës kritike, analiza e kërcënimeve dhe mbrojtja e të dhënave. Sipas artikullit, e vetmja pikë ku Shqipëria nuk mori vlerësimin maksimal lidhet me mbrojtjen ushtarake kibernetike, pasi nuk ka një doktrinë ushtarake të publikuar për operacionet kibernetike. Media evropiane vlerëson se sulmi kibernetik iranian i vitit 2022 ishte shkaku kryesor që e renditi Shqipërinë të parën në nivel global. Sipas Euronews, kriza u kthye në një proces modernizimi, me ndryshime në kuadrin ligjor, centralizimin e operacioneve të mbrojtjes kibernetike nën Autoritetin Kombëtar për Sigurinë Kibernetike, zgjerimin e bashkëpunimit me Bashkimin Evropian, Shtetet e Bashkuara të Amerikës dhe kompanitë e mëdha të teknologjisë, si edhe forcimin e sigurisë së platformës e-Albania, përmes së cilës ofrohen 95% e shërbimeve publike.