Me ironi dhe me fjalët e Gjergj Fishës, kryeministri Edi Rama iu përgjigj protestuesve, që i kërkonin për të 26-ën ditë dorëheqjen poshtë zyrës së tij. Kreu i qeverisë iu përgjigj njërit prej protestuesve, që lexoi në shesh disa projektligje, që sipas tij, vendosnin në shitje tokën shqiptare. Rama ironizon protestuesin, që sipas tij, nuk di të lexojë ligjin, të cilin kryeministri e publikon me foto. Ndërsa sqaron projektligjin, që sipas tij, është i procesit të negociatave dhe hyn në fuqi 7 vite pas anëtarësimit të Shqipërisë në Bashkimin Evropian. “Në fakt, ky është një nga projekt-ligjet e procesit të negociatave, i cili siç mund ta lexoni hyn në fuqi 7 vjet pas hyrjes së Shqipërisë në Bashkimin Europian, kur toka mund t’u shitet pushtuesve europianë në Shqipëri, njësoj siç mund të blihet nga pushtuesit shqiptarë në Europë, sepse me hyrjen në BE Shqipëria do jetë e madhe sa BE-ja dhe BE-ja do jetë e vogël sa Shqipëria”. Në një reagim më herët për protestën në Tiranë, kryeministri Edi Rama publikoi me zë turistë të huaj, që deklaronin se ishin nga Irani dhe i ishin bashkuar tubimit në kryeqytetin shqiptar. Vetë kryeministri ka deklaruar shpesh se protesta e Tiranës është nxitur nga Teherani, vend armik i Shqipërisë.