Nga hapat e parë në politikë te katër mandate në pushtet! Kryeministri Edi Rama rrëfeu gjithë rrugëtimin e tij politik, në një intervistë të gjatë televizive në këtë fillim-sezoni. Fokusin kryesor e vuri te dy projektet e shumëdiskutuar, ai i Sazanit dhe i Zvërnecit, kundër të cilëve po protestohet në Tiranë prej më shumë se 100 ditësh. Kryeministri sqaroi sërish se nuk do të ketë shitje të tokës shqiptare, ndërsa zbuloi se nuk ka folur asnjëherë për projektin me presidentin amerikan, Donald Trump. Dikur afër të tij në krye të qeverisë dhe krahu i djathtë i Edi Ramës, sot nga arratia me akuza të rënda ndaj tij. Ish-zëvendëskryeministri Arben Ahmetaj, në një intervistë pak ditë më parë, e cilësoi Ramën si kreun e një organizate kriminale, që sipas tij, e ka shndërruar shtetin në një strukturë mafioze. Në intervistën 4-orëshe, në podkastin e tij “Flasim” me gazetaren Rudina Xhunga, kryeministri Rama iu përgjigj me vetëm disa sekonda. Një tjetër ish-zëvendëskryeministre e qeverisjes së tij ndodhet përballë akuzave penale, por për Ramën rasti i Belinda Ballukut është i ndryshëm dhe nuk i kurseu akuzat ndaj njerëzve të drejtësisë. Një koment e pati sërish për situatën e krijuar në Bashkinë e Tiranës, që prej javësh Erion Veliaj po e drejton nga qelia e paraburgimit. Për herë të parë, Rama i dha të drejtë deputetit Erjon Braçe. Në 4 orë intërvistë, kryeministri Edi Rama vlerësoi punën e SPAK dhe Reformë në Drejtësi, zbuloi projektet e reja të këtij mandati qeverisës dhe tha se do të largohet nga pushteti, kur Shqipëria të bëhet pjesë e Bashkimit Evropian.