Kryeministri Edi Rama reagoi pas vendimit të Gjykatës Administrative për të zhbllokuar pagat për Gjykatën e Posaçme Antikorrupsion dhe Gjykatën e Durrësit. Kreu i qeverisë kritikoi ashpër vendimin e Administratives, duke theksuar se cenon ligjin dhe interesin publik. “Sikur Gjykata Administrative të kishte standard për çdo qytetar apo institucion në hall, shpejtësinë e skëterrës me të cilën paska vepruar sot për të hapur dyert e thesarit për rritjen e rrogave të veta pa miratimin e parlamentit, unë besoj se çdo shqiptar i punësuar do ishte gati t’ia falte një gjysmë rroge vrapuesve fluturakë të Gjykatës Administrative. Por të marrësh sa hap e mbyll sytë masën e parë të sigurisë në historinë e botës, jo për të ndaluar po për të nxitur për interesin vetjak ekzekutimin e një akti që me gjasë cenon ligjin dhe interesin publik, ndërkohë që mijëra e mijëra dosje hallesh presin me vite në sirtarët e gjykatës në fjalë, kjo është diçka tejet turbulluese!” Në përgjigje të gjyqtarëve, kryeministri Edi Rama publikoi pagat e tyre aktuale dhe rritjen që ata kërkojnë, që tejkalon 50%, duke theksuar në mënyrë të prerë që një vendim i tillë nuk mund të merret pa kaluar nga Parlamenti. “Ja edhe në tabelën bashkëngjitur çfarë kërkon Gjykata Administrative në dyert e thesarit të shtetit pa kaluar fare nga parlamenti, ndërkohë që e përsëris: Dyert e thesarit të shtetit i hap vetëm pushteti i pavarur legjislativ dhe Kuvendi i Shqipërisë do të bëjë detyrën e tij për këtë temë, në respekt të vendimit të Gjykatës Kushtetuese, ditën e enjte 17 shtator”. Një ditë më parë, gjyqtarët kallëzuan në SPAK ministrin e Financave, Petrit Malaj, për moszbatim të vendimit të Gjykatës Kushtetuese. Në reagimin e tij, kryeministri Rama kërkoi që të kallëzohej edhe ai vetë, si dhe ministri i Drejtësisë, pasi qëndrimi për pagat ishte konsultuar me ta.