Kryeministri Edi Rama nga forumi strategjik i Bledit në Slloveni, hoqi dorë nga retorika kritikuese konstante e viteve të fundit për shpejtësinë e zgjerimit t BE. Foli i kënaqur për planin e rritjes të BE, një paketë ekonomike prej 6 miliard eurosh për Ballkanin Perëndimor dhe ia përsëriti udhëheqësve Evropianë se kjo vëmendje për rajonin lulëzoi vetëm kur Vladimir Putin nisi agresionin ushtarak ndaj Ukrains “U ndjeva i inkurajuar, sepse më në fund dëgjova dikë të thotë atë që e them që ditën e parë. Ishte puna e Putinit. Atij iu desh të pushtonte një vend për të ndihmuar BE-në të kuptojë që po jeton në një botë paralele. Një vit më parë, këtu në Bled, Presidentja Ursula von der Leyen, premtoi planin e ri të rritjes që tani është vënë në rrugën e duhur. Duhet të bëjmë të gjithë punën për të qenë të gatshëm për të hyrë në BE. Të marrim më shumë instrumente e të hyjmë në më shumë hapësira të BE-së. Është një moment, ku ndihem ku ndihem pozitiv për BE-në”. Paneli i diskutimit të kryeministrave gjatë Forumit Strategjik të Bledit nisi me batuta mes kryeministrit tonë, Edi Rama dhe moderatorit. Gazetari nisi të flasë për çeljen e negociatave të Shqipërisë me BE-në, por kryeministri ndërhyri, duke kërkuar më shumë minuta në dispozicion për të dhënë përgjigjen. “Jua kam thënë pak ditë më parë, po e them dhe këtu, kur ftoni njerëz nga vende nga Ballkani, mos vini kronometër, të qenit shumë gjerman nuk është gjë e mirë. Kjo është arsyeja pse amerikanët ju kanë rekrutuar lehtësisht. Sa herë jemi të dy në skenë, gjërat bëhen virale. Sepse kemi rrënjë turke të dy”.