Kryeministri Edi Rama iu drejtua me një qëndrim CNN International dhe të gjitha mediave të tjera ndërkombëtare, që kanë pasqyruar protestën në Tiranë kundër investimit në Zvërnec. Bujës mediatike të protestës, kreu i qeverisë i përgjigjet me sqarimin se tubimi që vijon prej shtatë ditësh, nuk ka mbledhur në shesh më shumë se 8 mijë njerëz. “Ndërsa flasim, protesta e sotme ka mbledhur rreth 2,000 pjesëmarrës. Kjo është pjesëmarrja më e ulët deri tani, por edhe në kulmin e saj, pjesëmarrja nuk ka kaluar kurrë 8,000 njerëz. Kur histeria digjitale e prodhuar gjatë këtyre ditëve të ketë kaluar dhe klima emocionale të jetë qetësuar, bota demokratike duhet të shohë më nga afër se si hendeku mes realitetit dhe mënyrës se si ai u paraqit u bë kaq i madh”. Në reagimin e gjatë në X, kryeministri Rama ngre një sërë pyetjesh se si një protestë lokale, sipas tij, u kthye në një spektakël ndërkombëtar, ndërsa sqaron sërish se nuk ende projekt e leje ndërtimi, por vetëm një plan për zhvillimin e vendit. Ndërsa e cilëson sërish një luftë hibride, shefi i qeverisë ngre dyshime për përdorimin e inteligjencës artificiale në përmasat e protestës. “Gjatë kësaj rruge u shfaqën edhe video dhe imazhe të manipuluara me inteligjencë artificiale, pretendime të fabrikuara, amplifikim i koordinuar, rrjete anonime dhe sjellje online që mbartin shumë nga karakteristikat e luftës hibride të informacionit, duke ngritur pyetje legjitime mbi amplifikimin artificial dhe prodhimin e një vrulli digjital të fabrikuar”.