Kryeministri Edi Rama dënoi protestën e opozitës me molotovë e fishekzjarrë në rrugët e Tiranës. Kreu i qeverisë ironizon opozitën, teksa publikon fotografi të molotovit, dhe paralelisht edhe pamje nga sulmet e Shteteve të Bashkuara të Amerikës dhe Izarelit në Iran. “Shqipëria me botën e lirë kundër mullahëve të Teheranit, opozita shqiptare me plehrat kundër qytetarëve të Tiranës”, shkruan Rama, shoqëruar me fotot nga Tirana dhe Teherani. Ministrja e Brendshme, Albana Koçiu, tha se opozita nuk po proteston, por po provokon dhe po tenton të përshkallëzojë situatën, ndërsa shënjestroi dhe kryedemokratin Sali Berisha. “Duke u fshehur pas bandës së molotovëve, ky Don Kishot që grindet me koshat e mbeturinave si me mullinjtë e erës, e ka kthyer partinë e parë pluraliste në një repart zjarrvënësish”, u shpreh ministrja Koçiu, duke shtuar se “ky zjarr nuk djeg dot asnjë reformë dhe as të ardhmen europiane të Shqipërisë, por vetëm mbetjet e fundit të një opozite që nuk di më as kush është, as ku po shkon dhe as pse po bërtet”. Kreu i grupit parlamentar të Partisë Socialiste, Taulant Balla, publikoi pamje të molotovëve nëpër rrugët e kryeqytetit, duke pyetur me ironi “Po si ka mundësi që Partia e cila lindi nga idealet e dhjetorit ‘90, të përfundojë të ketë ideal djegien e kazanëve?!” Balla theksoi se pluralizmi politik në Shqipëri u ndërtua mbi parime demokratike dhe jo mbi forma dhune apo tensioni në rrugë.