“Ndjesë që nuk pata mundësi të isha aty me ju. Në fakt nuk ishte asgjë politike e minutës së fundit, ishte një problem teknik ajror me të cilin s’kisha të bëja asgjë, por nuk merrja dot avionin”. Është kjo arsyeja pse kryeministri Edi Rama nuk udhëtoi të martën drejt Brukselit për të marrë pjesë në Samitin e Zgjerimit, megjithatë ai u bë virtualisht pjesë. Përmes një video-mesazhi nga Tirana, Rama theksoi se në vitin 2030 Shqipëria do të jetë në tryezën e Bashkimit Evropian. “2030-a nuk është një datë që e kam parë në ëndërr, por një afat që vjen si rezultat i një përllogaritjeje shumë të thjeshtë. Në konsensus të plotë me Komisionin kemi rënë dakord mbi një kalendar mjaft ambicioz detyrash shtëpie për ne, për të mbyllur negociatat në fund të 2027. Pastaj, koha mesatare që kemi vlerësuar kur vjen fjala për ratifikimin nga 27 parlamentet i vendimit, është rreth dy vet, kështu që parashikojmë që Shqipëria të ulet rreth tryezës së BE në 2030-ën”. Pyetjes nga Brukseli se si po e lufton “Diella” korrupsionin, kryeministri Rama iu përgjigj me argumente të prera për Reformën në Drejtësi. “Shqipëria po bën diçka unike në ajon, reformën tonë në drejtësi. Veprimtaria e plotë e SPAK ka krijuar shembullin se lufta kundër korrupsionit është diçka që shkon përtej fjalëve dhe është tejet e ekuilibruar, pa parë djathtas apo majtas. Një gjë që asnjë vend në rajon nuk mund të pretendojë se e ka bërë. Jemi i vetmi vend në këtë proces që kemi përdorur AI në korpusin tonë ligjor. Po përpiqemi të vrapojmë sa më shumë është e mundur dhe që të hedhim hapa të mëdhenj duke përdorur AI”.