Nga protestat e Tiranës, që vijojnë prej katër muajsh, tek Inteligjenca Artificiale, përparësitë dhe rreziqet e saj. Këto ishin kryefjalë e fjalimit 25 minutësh të kryeministrit Edi Rama në Asamblenë e Përgjithshme të Organizatës së Kombeve të Bashkuara. “Revolucioni i flamengove”, tha Rama nga OKB, protestoi kundër një fantazme. “Narrativa e trilluar e një pushtimi izraelit të bregdetit shqiptar. Një pushtim që kurrë nuk ndodhi. U fabrikua, u personalizua e u përcoll përmes zërave, faqeve e kanaleve të cilave qytetarët u besonin tashmë. Pasojat ishin reale. Qytetarët kishin arsyet për të protestuar, por ata papritur ishin duke protestuar kundër një fantazme tashmë. Frika u bë zemërim, zemërimi u bë mobilizim dhe fabrikimi u bë realitet”. Nga Asambleja e Përgjithshme OKB-së, kryeministri Rama ia atribuoi sërish algoritmit nxitjen dhe përhapjen e urrejtjes në protestat e Tiranës. “Algoritmi nuk shpiku objektivin. Qe një aktor njerëzor që e bëri këtë. Algoritmi nuk e zhvilloi, nuk e ndezi urrejtjen, por zbuloi si ta aktivizonte urrejtjen tonë. Ky është mashtrim sistematik si shërbim. Shqipëria u bë vendi i parë që solli ministren e parë me IA, Diellën. E bëmë për t’i bërë procedurat më transparente dhe shtetin më llogaridhënës. Asnjë algoritëm nuk mban mandat. Pas çdo vendimi me ndikim publik duhet të mbetet një mandat ligjor”. Nuk mungoi një qëndrim i kryeministrit të Shqipërisë mbi debatin global për kufizimin e Inteligjencës Artificiale. Rama tha në OKB se Shqipëria është kundër këtij qëndrimi. “Disa përgjigjen duke kërkuar që inteligjenca artificiale të ndalet apo të ngadalësohet. Ne jemi shumë të vegjël, por më shumë respekt nuk do të biem dakord. Presidenti i SHBA-së ka të drejtë, nuk duhet të ndalemi, duhet të përshpejtojmë, por përshpejtimi duhet të ketë një drejtim. Na duhet një inteligjencë artificiale që është e verifikueshme, transparente dhe llogaridhënëse, e ndërtuar nga shoqëri të lira, ndarë mes aleatësh dhe vënë në shërbim të qytetarëve. Shqipëria bën thirrje për një marrëveshje ndërkombëtare për një inteligjencë artificiale sovrane e demokratike”. Përballë këtyre sfidave, kryeministri Edi Rama deklaroi se Shqipëria po ndërton një pasqyrë digjitale mbështetur mbi inteligjencën artificiale. “E drejta nuk mund të dekretohet nga asnjë qeveri”, u shpreh Rama, ndërsa sqaroi se “Pasqyra jonë synon të identifikojë manipulimin në kohë reale dhe jo të shndërrohet në arbitër opinioni”.