Kryeministri Edi Rama e mbylli vizitën zyrtare në Turqi, në kuadër të samitit të NATO-s, me një intervistë për median e njohur CNN Turk, ku u pyet dhe për protestat në Tiranë kundër projektit turistik 4 miliardë euro në Zvërnec. Nga Ankaraja, kryeministri Rama ripërsëriti se nuk ka ende një projekt përfundimtar për investimin, ndërsa shtoi se procesi mori përmasa globale, për shkak të përfshirjes së Jared Kushner, dhëndrit të presidentit amerikan, Donald Trump. "Ne gjithmonë i mirëpresim kritikat, sepse jemi një shoqëri e lirë. Por ka një problem të vogël: ende nuk ka një projekt për të kritikuar. Sepse projekti është ende në fazën e përgatitjes. Kur bëhet fjalë për detaje teknike, vendimi nuk mund t'i lihet vlerësimit të menjëhershëm të publikut. Por kur ka një projekt konkret, vlerësimi i publikut, sigurisht, do të jetë shumë i rëndësishëm”. Gjatë intervistës për CNN Turk, kryeministri Rama foli edhe për rezultatet e Samitit të NATO-s, marrëdhëniet Shqipëri–Turqi, situatën në Ballkan dhe bashkëpunimin në industrinë e mbrojtjes. Rama u shpreh se Shqipëria dëshiron të thellojë bashkëpunimin me Ankaranë dhe ftoi më shumë kompani turke të investojnë në industrinë shqiptare të mbrojtjes.