Edi Rama krahas votave të socialistëve shpall ambicien edhe të maksimalizimit të votës të diasporës për PS në parlamentaret e 2025. Kjo u pa qartësisht gjatë takimit mes Edi Ramës, koordinatorëve në 12 qarqe dhe kryebashkiakëve socialist gjatë një takimi në Tiranë. Top Channel nga një burim brenda mbledhjes mëson se kryesocialisti është shprehur se "janë potencialisht 1 milion vota në diasporë. Fusha është e hapur. Të gjitha forcat politike do të synojnë të marrin vota nga atje". Dhe për të qenë dy hapa përpara sic thotë Edi Rama, propozoi në këtë mbledhje zgjedhjen e koordinatorëve të diasporës në cdo nivel të PS. E ka avancuar më tej këtë ide në pasjen e koordinatorëve të diasporës në cdo qark. Vendosja në fokus e diasporës prej Edi Ramës vjen në një kohë kur për herë të parë, me ndryshimet në kodin zgjedhor, diaspora do të votojë me votë dërguar me postë. Kjo mbledhje trepalëshe mes Edi Ramës, drejtuesve politik dhe kryebashkiakëve socialist u zhvillua nën masa të forta sigurie. Për herë të parë në terren u pa drejtori i ri gardës së republikës Ermal Onuzi, i cili mbante një radio në dorë, e u largua menjëherë sapo Edi Rama hyri në sallën e pjësës anësore të ish pallatit të kongreseve.