Kryeministri i Shqipërisë, Edi Rama, dhe presidenti i Serbisë, Aleksandar Vuçiç, nëpërmjet një opinioni të përbashkët për gazetën prestigjioze gjermane “Frankfurter Allgemeine Zeitung”, kanë dalë me një ide të përbashkët për “rrugën realiste drejt Bashkimit Evropian”. Në opinionin e tyre ata nuk kanë insistuar për pranim në Bashkimin Evropian, por kanë bërë thirrje për pranim të shteteve të tyre në tregun e përbashkët evropian dhe në zonën Schengen. Në shkrim ata janë ankuar për moszgjerimin e BE-së që prej vitit 2013-s dhe kanë theksuar se realiteti është dekurajues. Ata thonë gjithashtu se BE-ja duhet ta kuptojë që “në Ballkanin Perëndimor ndodhet një vijë e re e frontit për investime”. Dy udhëheqësit kanë nënvizuar se i kuptojnë shqetësimet brenda BE-së, por sipas tyre edhe “nëse ka më shumë anëtarë, Unioni mund të funksionojë ende në mënyrë efektive”. Rama e Vuçiçi kanë thënë se e kuptojnë që ekzistojnë dy qëllime; një që vendet anëtare kërkojnë rrugë realiste drejt anëtarësimit të plotë e tjetra se shtetet anëtare duan ta ruajnë aftësinë vepruese dhe unitetin e BE-së. Këtë dilemë, ata janë munduar ta “zbusin” me një ide të tyre. “Prandaj ne mbështesim integrimin e përshpejtuar të vendeve kandidate të përgatitura, në tregun e përbashkët dhe në zonën Schengen. Kjo do të mund t’u sillte qytetarëve përfitime të prekshme, duke forcuar njëkohësisht pozitën ekonomike dhe gjeopolitike të BE-së, pa e ngarkuar arkitekturën e saj vendimmarrëse dhe pa e ndryshuar balancën institucionale. Kjo nuk do të nënkuptonte as të drejta vetoje, as komisionerë shtesë, as deputetë të rinj në Parlamentin Evropian apo ndryshime në strukturat e votimit. Jemi të bindur se kjo do të zbuste shqetësimet e atyre shteteve anëtare që hezitojnë përballë një zgjerimi më të madh – edhe sepse do të ishte shumë më e lehtë për ta që ta paraqesin procesin në mënyrë bindëse para opinionit të tyre publik”, thuhet në shkrimin e tyre. Shqipëria është më afër BE-së se Serbia. Në vitin 2025 u hapën edhe kapitujt e fundit negociues për anëtarësim, ndërsa Serbia në ka hapur 22 kapituj, por ka vite pa hapur të rinj dhe mbetet larg anëtarësimit.